مسرحية / الفراشة الزرقاء المشهد التالت والرابع .. تأليف / سامى النجار

المشـهـد الثالـث
( الحارس يقف بداخل كشك الحراسة )
الزعتر : صباح الخير أيها الحارس الشجاع
الحارس : صباح الفل
الفراشة : السلام عليك أيها الفارس الشجاع الذى
يؤدى عمله بذمة وضمير فى هذا الزمن
الحارس : دا واجبى وأنا ما عملتش غيره وأنا واحد
منكم ولازم أحافظ عليكم وده دورى هنا
الزعتر : طبعا يكفى إن كل الفراشات وأنا بنحبك
النمل الأسود : يا ابن اللئيمة قدر يأكل عقلهم
بالكلام المعسول
الحارس فعلا أنا شايف الحياة هنا جميلة وحاسس
بروح الحب ما بينكم
الزعتر : لأن كلنا بنكمل بعض
الحارس : بس أنا شايف انكم بتعيشوا فى الجبال يا ترى
إيه السبب ؟
الزعتر : شوف يا صديقى باختصار أحب أقولك إن إحنا
نباتات قلبنا أبيض لأن الزهرة بتاعتنا بيضة
وقلبها صافى وأشهر منطقتين بننمو فيهم جبال
سانت كاترين فى مصر والحجاز فى السعودية
الحارس : طيب يا عم زعتر امتى بقى بتتفتح الأزهار ؟
الزعتر : تتفتح أزهارنا فى شهر مايو ويونيه وهو نفس
توقيت بلوغ طور الفراشة لأنها بتتغذى
وبتتكاثر فى نفس الميعاد 0
النمل الأسود : دا أنا كده مليش عيش فى المنطقة
دى تانى بعد ما اتفقوا مع بعض لازم
أعمل حاجة تفرقهم ( مختبأ)
الحارس : طيب وانت يا فراشة إيه بقى حكايتك ؟
الزعتر : أنا لسه ما خلصتش حكايتى علشان تعرف
مدى أهميتى 0
الحارس : معلهش يا فراشة يا جميلة نسمع صديقنا الزعتر
وبعد كده نسمع حكايتك
الزعتر : لازم كل الناس تعرف إن ليا فوائدكثيرة
أساعد فى علاج الناس بعد ما يقوموا بجمعى
وتنشيفى لأنى مفيد لعلاج المغص وحالات تانية
الحارس : انت فعلا ليك دور مهم فى الحياة فعشان كده
لازم نحافظ على وجودك فى الحياة ونقدم لك
كل الخدمات لأنك مهم لكل الناس
الفراشة : أنا بقى عايزة أضيف لك معلومة أنا سمعت من
جدتى إن زمان كان فيه اتفاقية بين قبائل
البدو بعدم جمع النباتات البرية لفترة محدودة
علشان النبات يسترد عافيته من جديد
الزعتر : شفت يا صديقى إن أجدادنا كانوا بيقدروا كل
حاجة مش زى دى الوقت كل واحد عايز يدمر
الثانى ليه ما نرجعش زى زمان ونعمل الاتفاقيات
دى علشان نعيش فى سلام
(النمل الأسود يراقبهم دون أن يشعروا)
النمل الأسود : طيب والله لازم أهد كل اللى بتعملوه

إظلام

المـشـهد الـرابـع
(العنزة تجلس فى أحد أركان المسرح ويدخل عليها النمل الأسود )
النمل الأسود : انت قاعدة كده ليه ؟
العنزة مش عارفة أعمل إيه بعد ما مسكوا كل
أخواتى بفكر فى حل علشان أرجعهم تانى
النمل الأسود : ولقيتى الحل ؟
العنزة : أنا قررت أعمل اتفاقية معاهم واخد اخواتى
ونرحل من هنا
النمل الأسود : تبقى غلطانة إحنا عايشين هنا من زمان
العنزة : طيب ها نقعد هنا ونأكل منين ؟
النمل الأسود : طيب ما تيجى نعمل خطة ونطردهم
العنزة : لا حرام
النمل الأسود : ومش حرام إنهم يمنعوا عنكم الأكل
العنزة : طيب نعمل إيه عندك حل ؟
النمل الأسود : (بخبث) أنا كان ممكن أروح لأى حد
يعمل لى الشغلة دى لكن قلت إحنا لازم
نقف ضدهم إيه رأيك فى كشك الحارس
العنزة : ماله ؟ هانكله ؟
النمل الأسود : لا ها ندمره
العنزة : بس دا حرام لأنه بيحميه من العواصف
والمطر وده برضة إنسان غلبان
النمل الأسود : ومش حرام ان يقف ضدكم مع الفراشات والنباتات

العنزة : فعلا كلامك مظبوط وبكده أنقذ اخواتى منهم
والحارس مش حيلاقى مكان يقعد فيه ويرحل
النمل الأسود : أنا شايف انك بدأتى تفكرى بجد
العنزة : بس دا ها يبقى
النمل الأسود : ( مقاطعا ) انتى لسه ها تقولى بس
العنزة : طيب أنا موافقة بس ده ها يتم ازاى ؟
النمل الأسود : لا سيبى الموضوع ده عليا
العنزة : طيب قولىّ ها تعمل إيه ؟
النمل الأسود : أنا حا تسحب وأدارى تحت أى
شجرة وكل اللى عليك انك تروحى
لغاية الكشك بتاعه وتخرجيه منه وسيبى الباقى عليا

العنزة : بس أعرف انت حاتعمل إيه بالظبط ؟
النمل الأسود : أنا حاتصرف بطريقتى بس ابعديه قيمة
نصف ساعة بعيد عن كشك الحراسة وها يرجع
يلاقيه كوم تراب
العنزة : ( مترددة) بس أنا خايفه لا ننكشف
النمل الأسود : وايه اللى ها يكشفنا محدش يعرف الموضوع غير أنا وانت

( أغنية مع استعراض )

اظـلام

» مسرحية الفراشة الزرقاء من المشهد الخامس حتى النهاية .. تأليف / سامى النجار
» مسرحية / الفراشة الزرقاء تأليف / سامى النجار
» مسرحية للأطفال من مشهد واحد . الجـائزة تأليف / سامى النجار
» مسرحية للأطفال من مشهد واحد القرد الوفى ... تأليف / سامى النجار
» مسرحية للأطفال من مشهد واحد . الاعتراف بالخطأ تأليف / سامى النجار