الشاعر حسام غزال باحس خايف )

الشاعر حسام غزال
باحس خايف )

لما الضباب يفرد على دروبنا الستاير
لما الزمان يرسم على وشوشنا الدواير
لما الشتا يدخل على قلوبنا ثاير
باحس خايف .. رعشة شفايف
وسط الضباب مابقتش شايف
****
لما الرياح ترمى صراخها فى حلمنا
ونلاقى خوفنا بيستخبى فى دمعنا
لما العواطف م العواصف تتمحى
لما العيون مابقتش عارفة تستحى
باحس خايف .. رعشة شفايف
وسط الضباب مابقتش شايف
****
يا ام العباية..ياسنبلاية فستقى
ردى علية مانتى لازم تنطقى
ليه الوشوش لبست وشوش واتنكرت
ليه القلوب لبست جيوب واتحجرت
لية باحس خايف .. رعشة شفايف
وسط الضباب مابقتش شايف