عالم سمسم للمسرح
أسرة عالم سمسم للمسرح ترحب بكم وترحب بآرائكم ومشاركتكم فى المنتدى
عالم سمسم للمسرح

أدب - فن - مسرح - ثقافة نقد تراث
 
الرئيسيةالرئيسية  البوابةالبوابة  التسجيلالتسجيل  دخولدخول  
قريبا بالاسواق المجموعة القصصية الأولى البهلوان للكاتب والصحفى والمخرج المسرحى سامى النجار دراسة وتقديم الروائى وكاتب الأطفال فريد محمد معوض
انتظروا جريدة الموعد الرياضية فى ثوبها الجديد
قريبا فى الأسواق مجلة دنيا النجوم فى ثوبها الجديد أجرئ الحوارات الصحفية أخبار أهل الفن و الأدب
سامية والذئب مجموعة قصصية للأطفال للكاتب سامى النجار
سلوى والمكتبة قصص جديدة للأطفال للكاتب سامى النجار
قريبا بالاسواق رواية عيون تلمع فى الخريف للكاتب محمود عبد الله محمد والتى سوف يحولها الكاتب إلى مسلسل تلفيزيونى
صدور المجموعة القصصية حكايات الجد مشعل للكاتب محمود عبد الله محمد عن الهيئة العامة للكتاب وهى مجموعة قصص للطفل
تحت الطبع مسرحية الفراشة الزرقاء وهى مسرحية للطفل للكاتب سامى النجار
قريبا بالاسواق ديوان شعرى جديد بعنوان آه يا بلد للكاتب سامى النجار
صدور المجموعة القصصية ريحان والحقيبة البنية للكاتب محمود عبد الله محمد
أسرة عالم سمسم ترحب بالميدع زين العابدين فمرحبا به ونتمنى منه المشاركة بأعمالة الرائعة

شاطر | 
 

 مسرحية باب الجنة تأليف محمد عبد الحافظ ناصف

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
سامية سامى النجار
( المشرف العام )
avatar

عدد المساهمات : 47
تاريخ التسجيل : 25/02/2010
الموقع : http://samypress.blogspot.com

مُساهمةموضوع: مسرحية باب الجنة تأليف محمد عبد الحافظ ناصف   الجمعة 26 فبراير 2010 - 16:25

مسرحية للأطفال

بـــاب الجــنة


تأليـــف


مـحمـد عبد الحافظ نـاصف

إخراج


ســا مــى النجـار




شخصيات المسرحية
عم صابر مصاب فى حرب أكتوبر
أم السعد جدة الحارة

أطفال شارع المحبة
هالة
رمضان
ماركو
أحمد
العم حنا نجار
البرنس

أطفال شارع البرنس
البرنس
على الدجوى
طاطا
حبظلم
شخصيات أخرى ---- رئيس الحى
مشهد 1
شارع المحبة شارع مصرى به دكان بقالة لصاحبه عبد الحميد بجواره يقف عم صابر بعربة يبيع غزل البنات يقترب منه أطفال الشارع أحمد وماركو ورمضان
رمضان من بكره هنصوم ياجميل لاتقولى شعر البنات ولا
مصاصة عيال وحلبسة
ماركو ياترى بعد الفطار هتبيع لنا ايه ؟
صابر احنا هنبقى فى ايه ؟ أقصد أيام ايه ؟ موسم ايه ؟
أحمد رمضان يا عم صابر !!
صابر يبقى انتم نسيتم ياأولاد
ماركو نسينا ايه ياعم صابر ؟
صابر تمرهندى وعرقسوس صابر اللى بيبل العروق
ويروى العطش
ماركو عمرك ماتتغلب أبدا
صابر يابنى ماتعلمتش أكون مهزوم
ماركو كل وقت عندك وله أذان
صابر طبعا وله السلعة اللى تناسبه اتعلمت فى الجيش كده
ان أكون مستعد لكل حاجة وأحدد هدفى كويس
جدا واضرب فى اللحظة المناسبة
رمضان قناص ياعم صابر !!!
( يترك صابر العربة ويتحرك بعمق خشبة المسرح بعكازه
ويلتف حوله الأطفال )
أحمد ماشى ياعم صابر
( يخرج عبد الحميد من دكانه )
عبد الحميد مش هنخلص من الدوشه دى كلامك بنسمعه
من أكثر من ثلاثين سنة ياريت توسع علشان
الزباين انت واقف قدام الدكان يا صابر
صابر حاضر ياعبد الحميد
( يذهب بعربته ويحركها ويساعده الأولاد بهمه )
صابر وأخبار الزينة السنة دى مش شايف لكم حماس زى
كل سنة ياأولاد
ماركو السنة اللى فاتت كنا الأحسن ومع كدا فاز شارع
البرنس بجائزة أجمل شارع فى الحى
أحمد وانت نفسك رسمت له صور
صابر ( بتأكيد ) طبعا احنا اتفقنا يا أولاد الشارع الأحسن
هيأخذ الكأس وأرسم صورهم بالزيت وأعلقها كمان
علشان يشوفها الجميع وتثير حماس اللى ما كسبش
أحمد ماشى ياعم صابر يابطل شارعنا فى أكتوبر بتنصر
شارع البرنس علينا
صابر بنصر الحق يا أحمد ولازم يكون صوته دايما عالى
حتى لو وطى لحظة هيعلى تانى
الجميع ماشى ياعم صابر يارسام شارعنا يابطل !!!

اظــلام

مشهد 2
( يجتمع أطفال شارع البرنس ومعهم عمدة الشارع)
البرنس عاوزين ناخد الكأس ياأولاد
حبظلم زى كل سنة يا عمى البرنس
طاطا هو فيه حد يقدر علينا دا حقنا
على طبعا احنا دايما بنفوز وبنأخذ الأول على طول
حبظلم دا تاريخ يا على يا دجوى
على صح يا طاطا بالعمل نكسب مش بالتاريخ الطويل
البرنس كلمة فى محلها يا على بالعمل مش بالتاريخ
حبظلم يبقى لازم نجهز نفسنا نحضر الورق والنشا والغاب
والسلوفان وكل شئ
الجميع يا له بسرعة
اظلام


مشهد 3
(يجتمع أطفال شارع المحبة مع العم صابر تمر عليهم أم السعد جدة الحارة يراقب عبد الحميد ما يفعلون فى غيظ وتصدر منه حركات تلقائيه مضحكة )
أم السعد ايه أخباركم يا أولاد هتصوموا العام ولا متهيألى
ّ رمضان بتاع الحركات كبر وعقل خلاص
رمضان كبر وعقل يا جدة أم السعد
أم السعد ازيك يا صابر فين صورتى ياوله مش معلقها ليه
صابر ازاى أنا بعمل ليها برواز جديد علشان الشمس يا
جدة يا أم الأبطال
أم السعد احكى للعيال دول عن أكتوبر واللى حصل فيه
احكى لهم عن صيد الدبابات وعن زمايلك
الأبطال معاك احكلهم ومالكش دعوة بعبد الحميد
لوضايقك أكسر رأسه بالعكاز
عبدالحميد ماشى ياجدة مقوياه علينا
أم السعد كنت نايم فى الضليلة مع اخواتك البنات وهو ه
هناك على خط النار يا وله
عبدالحميد ماشى ياجدة ماشى احنامش هناخدفيكم لا حق
ولا باطل
أم السعد زيهم فى بلاد بره بيبسوا أيديهم وعاملين لهم
تماثيل هناك مش عربة شعر البنات وحبة حلبسه
عبدالحميد خلاص خلاص أنا غلطان 00 غلطان !!!
(يضحك الجميع 00 تخرج أم السعد )
أحمد ياسلام لوتحكى لنا كل يوم حكاية تسلينا فى
الصيام
ماركو وياريت تكون بعد العصر
رمضان أيوه 00 الواحد بيكون خلاص والجوع والعطش
عمل عمايله
صابر بشرط واحد يا أولاد
رمضان أول مرة تفرض شروطك
أحمد و كمان فى الصيام يا عم صابر
صابر طبعا لما ألقيكم مكسلين عن تزيين الشارع ومطنشين
يبقى لازم أفرض شروطى
ماركو بس إحنا بنعمل كل سنة
رمضان ومع كدا ما بنفوزش
أحمد ويأخذها شارع البرنس
صابر يبقى لازم نشوف بيعملوا ايه ونعمل أحسن منهم
رمضان لازم نعمل حاجة جديدة حاجة تفرض وجودنا
ماركو حاجة تعطينا الجائزة
أحمد نفكر !! لازم نفكر كويس !!

مشهد 4
(يتحرك عم صابر حول بقعة ضوء فى مقدمة المسرح 0 كأن خشبة المسرح ميدان حرب 0 يحمل أربى جى رغم عكازه أصوات طلقات رصاص وانفجارات
صوت اسمع يا صابر مفيش قدمنا حل دبابة واحدة ونقدر
نتعامل مع الباقى
صابر بس أنا معايا صاروخ واحد بس
صوت صاروخ واحد ودبابة واحدة ونفك الحصار على
طول بس اوعى تفلت منك
صابر (بحماس ) ماتخفش يافندم 00 ربنا معانا !!
صوت لو فلتت حتكشف موقعك وهنكون كلنا صيد سهل
الأرض مكشوفة يا صابر
صابر ربنا يسترها يا فندم
أصوات ركز يا صابر 00 ركز يابطل !!!!
صابر بسم الله 000 الله أكبر 0
( يأخذ صابر وضع اطلاق القاذف الصاروخى )
أصوات الله أكبر 000 الله أكبر
اظلام

مشهد 5
(يجتمع أطفال شارع المحبة حول العم صابر ؛يجلس عبد الحميد أمام المحل على كرسى )
ماركو (يلتفت حوله ) رحت وعرفت شارع البرنس ناوى
يعمل إيه يا عم صابر 0
رمضان (بلهفة) هيعملوا إيه يا ماركو
صابر جدع يا ماركو لازم تعرف كل حاجة عن المنافس
ولو قدرت تدرسه يبقى أحسن 0
عبدا لحميد (يهز رأسه) بس دا يبقى تجسس
صابر طبعا لا
أحمد لازم تعرف عدوك يا عم عبد الحميد
صابر مش عدو دا منافس يا أحمد
ماركو مفيش جديد ؛نفس الزينات الورق والسلوفان
الملون والفانوس بتاع كل سنة اللى بيعمله عم
فرج النجار
رمضان نفس الأزمة بتاع كل سنة دائما متفوقين علينا
بالفانوس
صابر لوكان الفانوس بس تبقى المشكلة اتحلت
استقرار وضع المنافس واعتقاده انه هيفوز
بداية فوزك
رمضان زى وضعنا ووضع إسرائيل فى 73
أحمد بس البرنس مش إسرائيل
صابر طبعا 0اسرائيل اعتقدت أنها لا تقهرو انها
تستطيع هزيمة مصر وان مصر خلاص مش هتحارب
ودى كانت بداية الخداع المصرى
ماركو يعنى نعمل خطة خداع لشارع المحبة
أحمد علشان يعتقدوا إننا استسلمنا ومش هنقدر نفوز
بالكأس
رمضان يثبتوا على الوضع كما هو نقوم احنا بالتغيير ونفوز
عبدالحميد يبقى لازم تخبوا اللى هايتعمل
صابر صح يا عبد الحميد ما تيجى معانا
عبد الحميد لا مش فاضى للعب العيال
صابر الله يسامحك يا عبد الحميد
ماركو الجدة بس هى اللى تقدر عليه
أحمد ولازم نخليهم يعرفوا اللى إحنا عاوزنهم يعرفوه بس
رمضان تقصد الزينة العادية فقط
ماركو نعم ونلعب معاهم لعبة الخداع الاستراتيجى
وكمان هيشوفوا اللى إحنا هنعمله
صابر تمام زى ما حصل فى 73
ماركو يعنى احنا هنحارب شارع البرنس
صابر (بحسم) لا هنافس علشان شارعنا يكون أجمل
شارع
ماركو (معتذر) خلاص هنافس شارع البرنس 0
صابر المهم اننا نفكر فى أشياء جديدة ماعملوهاش قبل
كده
رمضان ماشى لازم نفكر ونسأل
صابر أيوة 00 نسأل اخواتنا كمان !!
اظلام

مشهد 6
(صابر فى أرض المعركة يحمل على كتفة السلاح)
صوت هنعمل ايه يا رجالة ؟ معدش فيه نقطة مية واحدة
والعدو بيحاصر الموقع والباقى تنك ميه مالحة
صابر احنا رماة الجبل وشايفين كل حاجة والعدو واقف
تحتنا ومحتاجين شوية صبر لغاية المدد مايجى لنا
ونطربقها على دماغهم من فوق ومن تحت 0
صوت ولغاية مايجى المدد هنعمل ايه ؟
صابر بخار الميه يافندم نسخن الميه فى آذان الأكل
وماسورة يخرج منها البخار ويبرد ونشرب ميه حلوة
صوت فكرة جميلة 000 نجربها 00
(أصوات طلقات رصاص وانفجارات مدوية )
صابر الحمد لله 00الله أكبر بلت الميه القليلة عروقنا لحد
ما جات قوتنا وهجموا عليهم من تحت وهجمنا من
فوق وهربوا زى الفيران

اظلام

مشهد 7
(فى شارع البرنس يقف طاطا وعلى الدجوى وحبظلم يقترب منهم ماركو ورمضان )
طاطا أهلا برمضان وماركو جايين تشوفوا عاملين ايه
ماركو طبعا بس احنا فين وانتوفين يا شارع البرنس
لوكان العم فرج يعمل لنا فانوس زيكم
حبظلم (بكبرياء) كل شارع يستخدم امكانياته
رمضان حظوظ 0 مبروك عليكم الكأس
على (بفخر )طبعا الكبير كبير يارمضان والكأس دايما من
نصيبنا
ماركو مبروك عليكم ياسيدى
حبظلم (بسخرية) عقبالكم 0اجتهدوا حبة فكروا ودبروا
رمضان السنة الجاية إن شاء الله
ماركو مبروك عليكم الكأس

اظلام
مشهد 8
(فى أرض المعركة يقف صابر مذهولا يتحصن جندى اسرائيلى فى خندق لا يظهر منه إلا مقدمة سلاحه )
صوت استشهد منا عدد كبير والنار جاية بكثافة من الاتجاه
ده هنعمل ايه ؟ عاوزين حد يوقفه بسرعة
صابر حديؤمن طريقى لغاية ماأطلع له فوق مفيش حل الا
كدا وواحد يقابل ربه كمان
صوت ربنا معاك يا صابر
اظلام




مشهد 9
(فى شارع المحبة يجتمع الأولاد حول العم صابر )
ماركو تمام يا عم صابر الموقف زى ما هو
رمضان مفيش حاجة اتغيرت
صابر يبقى نبدأ من هنا لازم حاجة جديدة يا أولاد
أحمد جات لى فكرة يا عم صابر
صابر ( بحماس ) قول بسرعة
أحمد نجمع ونعمل فانوس كبير ينور ظلام الشارع فى
الليل 0كل واحد يدفع اللى يقدر عليه
رمضان نكسر كل الحصالات
ماركو ودا يعمله عم حنا النجار أكيد هايجاملنى يا جماعة
بصراحة أنا بشتغل معاه فى كل أجازة علشان أتعلم
صنعة بابا دايما بيقول
ص الأب صنعة فى اليد تغنى عن الذل
صابر يا سلام على الأفكار اعتقد ان دا هيكون جديد
أحمد وممكن ندهن شارعنا فرشة جير ونرسم على
الأسفلت كمان وعلى الحيطان نعمل مسابقة
عم صابر رائع 000 رائع
( تمر عليهم أم السعد ومعها البنت هالة )
أم السعد هو ايه اللى رائع أنا عاوزه أشوف شغل
هالة أنا عندى فكرة ياجدة
أم السعد قولى ياروح الجدة
هالة يبقى عندنا مكتبة فى الشارع مكتبة جدى
الصغيرة تتحرك على عجل
عبد الحميد فى المحل بالليل وجنب المحل بالنهار
أم السعد ياه 00أخيرا هتشارك معانا
صابر بس دا لعب عيال
عبد الحميد فرصة الواحد يلعب شوية
أم السعد ياله عاوزين شغل حاجة ترفع رأسنا يا صابر زى
ما رفعتها فى 73
صابر هيحصل ياجدة أم السعد وعمرها ما هتنزل أبدا
وعد منى ومن كل الولاد ان الدم فيه فدا بلدى
أم السعد عارفة يا صابر عارفة !لما الولاد بيوعدوا بيوفوا
وبيجيبوا نور الصباح ياله عاوزين شغل
الجميع حالا 00000 حالا
يحضر الأولاد الأشياء ويأتى النجار ويبدأ فى تصنيع الفانوس
والمركب ويبدأ الأولاد فى الرسم ودهان الحيطان فى سعادة
اظلام

مشهد 10
(يعلق الأطفال زينات شارع المحبة فى سعادة نشاهد الفانوس المركب معلقا وكذا المكتبة بجوار دكان عبد الحميد البقال )
عبد الحميد كدا تمام !!كل شئ اكتمل !!
ماركو أعتقد ان الكأس ستكون لنا
رمضان ان شاء الله يا ماركو
أحمد متى سيمر رئيس الحى ولجنة التحكيم على
الشوارع كى يختاروا الفائز لهذا العام
صابر غدا !!!!!!!!!
ماركو يبقى لازم نحرس شارعنا
رمضان من ايه يا ماركو ؟
أحمد من أى حاجة ؟من أى حاقد أو عقل صغير !!
يفسد اللى عملناه
رمضان الزاى كل حاجة اتعلقت ومحدش هيطول
حاجة
صابر ما انت عارف حركات العيال الطوب والنبل
ماركو صح يا عم صابر 00 صح !!
صابر وأنا اللى هحرس الزينات وهسهر الليلة يا أولاد
أحمد أحسن حارس يا عم صابر وأكرم عيون حرست بلدنا
صابر أشكرك يا أحمد !!!
(يترك الأولاد عم صابر تسلط بقعة ضوء على العم صابر يتحرك فى هدوء ترتفع دقات العكاز على خشبة المسرح ترتعش الأضاءة وأصوات انفجارات )
صوت حاسب يا صابر 0حاسب خلى بالك من نفسك 0
صابر لازم أسد فتحة النار لازم نحتل الدشمة دى
صوت حاسب 000 حاسب !!!
( يتقدم نحو مكان مرتفع موسيقى متوترة يقترب أكثر
يسد فتحة النار بجسدة )
صابر لازم أسد فتحة النار 00فتحة النار 0باب الجنة
صوت حاسب 000 حاسب !!
صابر آه 000 الله أكبر 000 الله أكبر !!

اظلام
مشهد 11
( يجتمع طاطا وحبظلم وعلى الدجوى والبرنس فى شارع البرنس )
طاطا (بحزن) عرفت ايه اللى حصل يا عم البرنس ؟
البرنس نعم شارع المحبة أجمل من شارعنا
حبظلم بس هنكسب يا عم البرنس
البرنس (بعصبية ) طبعا لازم نحاول نجمل شارعنا أكثر
ونبذل أقصى طاقة عندنا لكن الوقت فات
على أيوة ماعدش له لازمة كدا مش هنكسب الجائزة
هنجمل لمين بعد المسابقة
البرنس لنا 00لشارعنا ولحينا وهو دا الهدف من المسابقة
جمال شوارعنا مش الكأس
حبظلم بس الوقت فات 00فات واللى فات مات !!1
البرنس مش مهم درس ونتعلم منه ويجب علينا احترام
المنافس ونسيبنا من اللى فات ودا كان خطأ
المجموعة اللى اشتغلت ( يخرج )
على بس الوقت لسه ما فاتش
طاطا الزاى يا ناصح ؟
حبظلم معدش وقت نعمل حاجة !!
على بس فيه وقت نفسد حاجة !!
طاطا دماغك راحة فين يا على ؟
على كل واحد فينا عشر طوبات ومعلاق صغير ونبلة
وكل حاجة تبقى على الأرض
طاطا يا ابن الأيه !!
اظلام

مشهد 12
(يجلس صابر بجوار عربة العرقسوس ليلا يستند على عكازه من بعيد يتسلل على وطاطا وحبظلم فى هدوء يمسكون المعاليق والطوب والنبل يراهم البرنس ,يترك مكانه يطلق على طوبة فى الفانوس ويرمى طاطا بمعلاقة ويقذف حبظلم بالنبل يتقطع الفانوس وتطفئ أنوارة
صابر من هناك ؟ من هناك ؟ امشى يا جبان انت وهو
على اجرى ياحبظلم بسرعة انت وطاطا 00بسرعة
صابر عرفتكم يا ولاد شارع البرنس صدق الولاد 000
صدق الولاد الخوف من ايد حاقد أو من دماغ
صغير (يأتى أولاد الشارع ومعهم عبدالحميد)
عبدالحميد سمعتك يا صابر وانت بتصرخ
ماركو وشفتك يا عم صابر وانت بتجرى وراهم
رمضان لازم نعمل فى شارعهم زى ما عملوا فى شارعنا
أحمد طبعا العين بالعين والسن بالسن والبادى أظلم
صابر لا طبعا لسه عندنا وقت نصلح الشارع ونفوز
بالكأس يا أولاد
رمضان وحقنا يا عم صابر يضيع ؟
صابر لا لما نفوز بالكأس دا أجمل حق لنا
ماركو فعلا 0يبقى نشوف هنعمل ايه ؟
صابر هنصلح اللى انكسر ودا مش كتير
عبدالحميد ساعة واحدة وكل شئ يبقى تمام
صابر وعمرهم ما هايجوا هنا تانى
(تمر عليهم الجدة أم السعد وهالة )
الجدة طبعا خلاص هما ضربوا العصا اللى ماتموتش
يا صابر تقوى يا ولدى فاكر قبل أكتوبر كان ايه
صابر (بحزن )عصا 00ما موتتش مصر
الجدة بس قوتها على النصر الجديد فاكر يا صابر ؟
صابر فاكر يا جدة العصا اللى ما تموتش تقوى تمام
رمضان واحنا فهمنا كمان
ماركو خلال ساعة كله ها يبقى تمام
أحمد حاجات بسيطة ويعود الشارع أجمل 0
هالة ها روح أجيب النشا والورق حلا
رمضان ( بحزن) بس أنا فى قلبى نار ومش ها نسيب حقنا
صابر لا يارمضان لو عدو اوعى تسيب حقك لكن دول
اخواتك برضه صحيح فيهم حاقد ودماغ صغيرة
لكن هما اخوات لنا
الجدة بصوا ياولاد الأخوة بصحيح ما يتصارعوش يتنافسوا
بجد و ما يتخانقوش وان زعلوا فى يوم يقولوا وما
يخبوش لو كان دا فى يوم ميثاقنا ها نعود كما كنا
فى يوم جهادنا رجالة بجد ما يتغلبوش
صابر فعلا يا جدة وللحى كبير ها يجيب حقنا أنا متأكد
الجدة رئيس الحى رجل جدع كان قائد ابنى فى أكتوبر
لواء دوغرى يعرف الحق 0

اظلام
المشهد الأخير
(منصة حيث يقف رئيس الحى وحوله اللجنة ,يعلن الفائز بجائزة أجمل شارع 000 يقف الجميع فى انتظار النتيجة )
رئيس الحى أعلن فوز شارع المحبة بجائزة أجمل شارع
فى رمضان ودرع الأخلاق والصداقة وعقاب
شارع البرنس وحرمانه من الاشتراك فى
المسابقة مع تجميل الشارع لمدة عامين
رمضان الله أكبر 000يحيا العدل
الجميع الله أكبر000 يحيا العدل
(استعراض وأغنية الختام )

اظلام
الرجوع الى أعلى الصفحة اذهب الى الأسفل
 
مسرحية باب الجنة تأليف محمد عبد الحافظ ناصف
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
عالم سمسم للمسرح  :: مسرح عربى-
انتقل الى: